Samspil náttúru og orkuvinnslu

Við fyrstu athuganir á virkjunarhugmyndum skipta góðar upplýsingar miklu máli til að móta tilhögun einstakra virkjana og lágmarka umhverfisáhrif eins og kostur er.

Margra ára rannsóknarvinna liggur að baki hverjum virkjunarkosti og á þeim grundvelli er verkefnið skilgreint með hagkvæmni, sjálfbærni og lágmörkun neikvæðra umhverfisáhrifa að leiðarljósi. Landsvirkjun hafði um tuttugu virkjunarkosti til skoðunar og greiningar árið 2015. Fjöldi virkjunarkosta gefur samhliða möguleika á aukinni orkunýtingu og aukinni verndun.

Endurskoðun á umhverfismati Hvammsvirkjunar

Hvammsvirkjun var á árinu færð úr biðflokki í nýtingarflokk rammaáætlunar með þingsályktun Alþingis, en unnið hefur verið að undirbúningi og rannsóknum á fyrirhugaðri Hvammsvirkjun um árabil. Fyrirtækið hefur lagt mikla áherslu á mótvægisaðgerðir til að lágmarka neikvæð umhverfisáhrif virkjunar, ekki síst á fiskistofna á svæðinu.

Nánar um rannsóknir á fiskistofnum í Þjórsá.

Fyrirhuguð Hvammsvirkjun mun nýta fall Þjórsár neðan Búrfellsvirkjunar, frá svokölluðu Yrjaskeri rétt ofan við bæinn Haga og niður fyrir Ölmóðinsey austan við Þjórsárholt.

Mat á umhverfisáhrifum var framkvæmt árið 2003 og hefur matsskýrslan síðan þá verið í gildi. Þar sem framkvæmdir hafa hins vegar ekki hafist innan áratugar frá gerð skýrslunnar þurfti Skipulagsstofnun lögum samkvæmt  að ákveða hvort endurtaka þyrfti matið í heild eða að hluta. Niðurstaða stofnunarinnar var að endurskoða bæri áhrif virkjunar á landslag og ásýnd lands annars vegar og ferðaþjónustu og útivist hins vegar.

Nú er hafin vinna við þá endurskoðun. Aðrir hlutar umhverfismatsins eru áfram í gildi. Fyrsta skrefið í endurskoðunarferlinu er að útbúa matsáætlun, sem gerir grein fyrir hvernig staðið verður að mati á áhrifum virkjunar á framangreinda þætti. Drög að tillögu að matsáætlun hafa verið kynnt og bárust nokkrar athugasemdir og er gert ráð fyrir að endanleg tillaga að matsáætlun liggi fyrir í aprílbyrjun 2016.